16. ՅԻՍՈՒՍԻ ՓՈՐՁՈՒԹԻՒՆԸ (Մատթ. Գ. 1-11)

¹Դրանից յետոյ Յիսուս անապատ տարուեց Հոգուց՝ սատանայից փորձուելու։ ²Եւ քառասուն օր ու քառասուն գիշեր ծոմ պահեց, ապա քաղց զգաց։ ³Եւ փորձիչը՝ սատանան, մօտենալով նրան՝ ասաց. “Եթէ Աստծու Որդին ես, ասա՛, որ այս քարերը հաց լինեն”։ ⁴Նա պատասխանեց և ասաց. “Գրուած է՝ ﬕայն հացով չի ապրի մարդ, այլ՝ այն ամէն խօսքով, որ դուրս է գալիս Աստծու բերանից”։ ⁵Ապա սատանան նրան տարաւ սուրբ քաղաքը և կանգնեցրեց նրան տաճարի աշտարակի վրայ ու ասաց նրան. ⁶“Եթէ Աստծու Որդին ես, քեզ այստեղից ցա՛ծ գցիր, որովհետև գրուած է՝ իր հրեշտակներին պատուիրուած է քո մասին, և ձեռքերի վրայ պիտի վերցնեն քեզ, որպէսզի երբեք քո ոտքը քարին չխփես”։ ⁷Յիսուս դարձեալ նրան ասաց. “Գրուած է՝ քո Տէր Աստծուն պիտի չփորձես”։ ⁸Սատանան նորից նրան առաւ տարաւ ﬕ շատ բարձր լերան վրայ և ցոյց տուեց նրան աշխարհի բոլոր թագաւորութիւններն ու դրանց փառքը և նրան ասաց. ⁹“Այս բոլորը քեզ կը տամ, եթէ գետին ընկնելով ինձ պաշտես”։ ¹⁰Այն ժամանակ Յիսուս նրան ասաց. “Ետե՛ւս գնա, սատանա՛, որովհետև գրուած է՝ պիտի երկրպագես քո Տէր Աստծո՛ւն և ﬕայն նրա՛ն պիտի պաշտես”։ ¹¹Ապա սատանան նրան թողեց. և ահա հրեշտակներ մօտեցան ու ծառայում էին նրան: