Ես մի մանուկ եմ դառնում` մանուկների աշխարհում,
Մարած կրակս է հեռանում մանուկների աշխարհում:
Ինչպես ծովում մարգարիտ` , անհայտ աստղեր` երկնքում,
Այնպես գանձեր կան թաքուն` մանուկների աշխարհում:
Ամպրոպ չկա, ամպ չկա, ձմեռ չկա, ձյուն չկա,
Միշտ գարուն է ու գարուն` մանուկների աշխարհում:
Միշտ ծիծաղ է, ցնծություն, միշտ շարժում է, խաղ ու վազք,
Եռանդը միշտ վարարուն` մանուկների աշխարհում:
Միշտ հանդես է, երգ ու պար, միշտ վճիտ է ու պածառ,
Լույսը երբեք չի մարում մանուկների աշխարհում:
Ծաղիկներ կան անթառամ, թռչուններ կան հազարան,
Արևը մայր չի մտնում մանուկների աշխարհում:
Հազար տարի էլ ապրես` չես հագենա, չես հոգնի,
Հոգիդ երբեք չի մթնում մանուկների աշխարհում: